Q ofka soomaaliga ahi waxa uu tusaale u yahay badowimo iyo aqoon darro,
siiba marka laga eego aragtiyaha uu ka haysto ummadaha kale. Waxa ay soomaali
badani aamminsan yihiin in dadka aan muslimiinta ahayni ay aad u neceb yihiin
diinta islaamka oo ay ka fakaraan sidii wax loogu dhimi lahaa islaamka. Sida
loo fakarayo waxaa nacaybkaas islaamka loo qabo ugu daran yuhuudda iyo
caddaanka! Waa aragti aan haba yaraato ee sal lahayn oo shacabka yuhuudda iyo
caddaanku mashquul ku ma aha diin. Badankoodu diimihii ay haysan jireen maanta
ma ay haystaan oo in ay shaqaystaan baa diin u ah. Midda kale dadku wax bay
barteen oo in ay dhaqan dad iyo diin dad necbaadaan waa ay ka horumarsan
yihiin. In diin la isu necbaado waxa ay u arkaan badownimo xilli hore jirtey
oo aan maanta munaasib ahayn. Inta uu qofka soomaaliga ahi ku jiri lahaa
aragti gaaban oo ah in ay yuhuud iyo caddaan diintiisa neceb yihiin waxaa u
fiican in uu dadka barto oo uu la sheekaysto si uu u ogaado in aysan cid diin
wakhti ku lumisa ama ka fakartaa jirin. Waa ay jiri karaan dad siyaasadda
caalamka kor ka indha indheeya oo aan jeclayn in uu islaamku ku faafo meelo
hor leh, laakiin kuwaasi waa qofqof sare ee ma aha hummaagga guud ee bulshada
yuhuudda iyo caddaanka.

Aragtida kale ee ay soomaalidu qabaan ee khaldani waa in qofkii soomaali ah oo
diinta islaamka ka baxa ama dhaleeceeya ay yuhuudda iyo caddaanku lacag
siiyaan! Lacagtu sidaas u ma fududa oo qof soomaali ah oo diin uu ku jirey ka
baxay oo dhaleeceeyey cid lacag siinaysaa ma ay jirto. Sida la og yahay
dalalka ay yuhuudda iyo caddaanku joogaan waxaa tuugsada dad badan. Maxay inta
diin wax ka sheegaan lacag ugu heli waayeen si ay tuugsiga uga maarmaan?
Dalalka horumaray dad badan baa waxa ay ku nool yihiin lacag aad u yar oo ay
soomaalidu ”Cayr” u yaqaanniin. Maxay dadkaasi diinta islaamka inta wax ka
sheegaan u taajiri waayeen? Xataa qofkii reer galbeed ah oo kaniisadda galaa
ka ma uu helo cunto iyo meel uu seexdo oo kaniisaddu dadka ma biisho. Sidaas
darteed kaniisaddu lacag cidna ma ay siiso oo qofkii diin ahaan u galaa inta
uu wax ku caabudo ayuu gurigiisa ama makhaayad cunto u raadsadaa. Galbeed ka
ma uu jiro qof maalqabeen ah oo diin lacag ku bixiyaa, isla markaas ma ay
jiraan hay’ado qof diin ka hadlay lacag ku siiyaa. In lacag la helaa waxa ay
ku xiran tahay in uu qofku shaqaysto oo uu xammaalo ama uu ganacsi sameeyo
haddii uu hanti iyo fakrad isla hayo.

Sida aynu og nahay qofka soomaaliyeed ee sannadihii danbe wax ka sheegga
islaamka ugu afdheerayd waxa ay ahayd Ayaan Hirsi Magan. Waxa ay noqotay dadka
aan jiritaanka Eebbe rumaysnayn ee u arka in uu Eebbe yahay wax ay dad ku soo
fakareen oo khiyaali ah, ka dibna waxa ay ku fogaatey dhaleecaynta iyo ka
hadalka islaamka. Ayaan waa ay shaqaysataa oo buugaag bay qortaa oo ay indhuhu
ku madoobaadeen si ay masruufkeeda u la soo baxdo, cid lacag ku siisay in ay
islaam wax ka sheegtayna ma ay jirto. Haddii aysan shaqaysateen waxa ay geli
lahayd xafiiska cayrta ee Holland si ay cunto u hesho. Ma ay jirto cid naag
madow oo diin waddamo kale laga haysto dhaleecaysay lacag ku siin lahayd.
Adigu qof caddaan ahi haddii uu kaniisadda caayo lacag ma siin lahayd? Haddii
lacag sidaas lagu helo dad badan baa ku hodmi lahaa ee madaxaaga ka saar
waxaas liita! Lacagtu dunida oo dhan waa wax aan dhib yaraan lagu helin.